香港邊緣勞工口述

我很喜歡這本小書，書中講述十三個有血有肉的勞工故事。 當中有的是勞碌一生，退而難休的社會涼薄遭遇，有的是生不逢時，面對經濟轉差，勞力貶值的無奈境況，以及人浮於事，備受剝削的經歷。

七十五歲的雲姨，憶述她二十歲時：「我個同鄉介紹我去深水埗大南街嘅山寨廠學織襪。果時學織襪好巴閉㗎，要成六十蚊介紹費，學滿師仲要織兩打襪來報效師傅」，「但係我地喺織襪廠只係做咗年幾，個師傅就走咗去東頭邨打石山街另外開廠」。「我就去咗北河街一間五金廠做錶帶啤工。我份工每日一蚊六毫，八至八，要做十二個鐘，果陣時冇假放㗎。間廠用嘅手搖啤機其實都幾危險，我都試過啤傷手指好多次，不過就唔嚴重，通常我地都係揾啲紅花油搽吓就算數，邊有而家話工傷咁架勢呀。」(p.8)

五十年代，雲姨一個人要照顧四個孩子，唯有到附近的山寨廠拿外發工作回家，跟小孩子一起做。「啲細路個個都要幫手穿膠花，穿珠仔，要揻水喉，黏膠紙。咁多人一齊做，先至一日賺得果一、兩蚊，有時出咗糧，啲細路想食碗粥，嘩，一碗豬紅粥要兩、三毫子，唔捨得食㗎，我就一毫子買碗白粥俾佢地食。」(p.10)

雲姨的小孩長大了，於是在六十年代末到八十年代末，她在五金廠做啤工。「我出番嚟工廠做果時，都已經四十幾歲，手腳又唔係快」，「但係啤工雖然簡單，呢啲比較粗重嘅工作又唔係人人都鐘意做。我啤過好多嘢㗎，電筒啦，各種鐵片銅片啦，熨斗板啦；我手啤又做過，腳啤又做過，啤嘢都啤咗成十幾廿年。喺呢十幾廿年裡，小小啤親手腳就時時有，但係好彩冇乜大礙。」(p.11)

八十年代末，五金廠大量北移，當時已六十歲的雲姨也失業了。沒有了工廠，她就去洗碗，過着自食其力的生活。可惜，這一、兩年，她的身體愈來愈差，進進出出醫院好幾次，就連合作多年的僱主也不敢再用她了。她現在只好每月拿七百元生果金過日子。

雲姨晚年的心願竟是：「我啲仔女對我都幾關心，但係我成日叫佢地顧住啲孫仔孫女先。我知道佢地唔係唔想養我，佢地自己嘅生活都好艱難，自身難保，唔駛我擔心就已經好好啦。」(p.5)

同學們，當你讀到勞動市場、勞力供應、工資的類別，以及失業等課題，別只冷冰冰的理解這一堆概念。回想這個平凡，卻是一個有血有肉的故事，想想如何運用學到的知識去幫助身邊有需要的人。

林瑞含主編。2003。《香港邊緣勞工口述》。香港：樂施會。